Rojî malimanî dinya yê mîyanî neteweyan sey 5i aşmê êlul yeno zanayiş û her serr na roj de yeno fîraz kerdiş. Tirkîye de eqsî dinya 24î teşrîna peyêne de yeno fîraz kerdiş.
Se ke yeno zanayiş konferansa ke bi nameyî “ Statuya Maliman ya Mîyanê Hikumetan ya Taybet” gazî kerdişî UNESCO sero ameyebî hedrekerdiş, 5î êlul 1966 de qedîyayî. Peynîye konferans de hetî UNESCO (Rexistinê Yewbîyayê Neteweyan yê Perwerde, Zanist û Kultur) û ILO (Rexistinê Xebat yê Mîyanî Neteweyan) ra pêşnîyazî “ Şîretî Statûyê Maliman” bi yew veng ame qebûl kerdiş. No ridra her serr zaf cayanî dinya de 5i aşmê êlul sey “Rojî Malimanî Dinya” yeno qebûl kerdiş.
Labelê taye dewletî ereban 28î Sibat, Tirkîye zî 4î êlul sey “Rojî Maliman” qebûl kenî.
Tirkîye de edetî 24î teşrîna peyêne sey rojî malîman pîrozkerdiş yew pêdmendeyê faşîzma 12 êlul o. Se ke yeno zanayiş cunta xo sey “Ataturkcî” îlan kerd û waşt ke her kerdinê xo goreyê na îdeolojî bikero. Qaşo Mustafa Kemal 24î teşrîna peyêne 1928 de xo sey “Malimo Sereke yê Mektebanî Milet“ îlan kerdo. No ridra goreyê îdeolojîya resmî nameyî “Ataturk” lîteratur de sey “Malimo Tor Gird” cayî xo girewt û heme kîtabanî ders de wina ravîyert.
Se ke yeno vîr Cuntaya 12 êlul 1980 yê Kenan Evren hende des hezaran kedkarî perwerde kerdişî îşkence ra ravîyarnayî û eştî zîndanan. TÖB-DER (Komelê Yewbîyayiş û Hetkarî yê Maliman yê Tirkîye) ke diseyhezar ra zaf endamî aye bî û Şeşsêûpancas şubeyî aye bî, qefilna û endamî aye sey “endamî yew rêxistina teberîqanûn – îlegal) qebûl kerdî, îşkence ra ravîyarnayî û eştî zîndanan.
Labelê rejimî cunta hem wina yew îhanet kerd maliman, hem zî 24î teşrîna peyêne sey “Rojî Maliman” tesbît kerd. Çi heyf ke a roj ra heta ewro 24î teşrîna peyêne sey “Rojî Maliman” yeno fîraz kerdiş.
Partîya Maf û Azadîyan / HAK-PAR vana ke ganî malimî ke sey fatîhî zerrê qicanî ma yenî zanayiş, egît, wefakar û cefakar malimî ma, na roja ke pedmendeyê cunta ya, sey rojî xo qebûl nêkî.
HAK-PAR, tekoşîna ke kedkarî perwerde kerdişî semedê awan kerdişî sendîqaya bi heqanî grev- muqaweleyê komkarî, ramnenî, nayê destek kena.
Ganî rêxistinî maliman 24î teşrîna peyêne red bikerî, 24î teşrîna peyêne ke eserî yew îdareyo nîjadperest – faşîst û îşkencekar o, ganî bêro tepîya îade kerdiş. 24î teşrîna peyêne ke eserî yew genaralo ke rutbeyî ey ameyo wekerdiş û bi îdam ameyo mehkima kerdiş, sey resmî bêro wedartiş.
Malimî ma herindê 24î teşrîna peyêne de, 5î êlul sey “Rojî Maliman” fîraz bikerî hîna bi mehne beno.
Ganî malimî ma semedê pakkerdişî rêçanî û pêdmendeyanî 12î êlul, semedê awan kerdişî yew cûya azad û demokratîk, qicanî ma rê rayberîyê bikerî, ameyeyî ma roşn bikeri. Neslo newe sey yew nesilo mezgî înan azad, îradeyî înan azad û giredayê demokrasî perwerde bikerî.
24.11.2019
Buroyê Çapamenî yê HAK – PAR
About Post Author
