16. SALVEGERA DAMEZRANDINA PARTIYA MAF Û AZADIYAN HAT PÎROZKIRIN
Partiya Maf û Azadiyan ji bo 16emîn salvegera damezrandina partiyê pîrozbahiyek li dar xist.
Ligel endamên partiyê; gelek siyasetmedar û rûspi, xebatkarên çapemeniya Kurd jî bi elaqeyek mezin beşdarî şevê bûn.
Serokê Weqfa Riya Azadî û Nivîskar Kemal Burkay, Nivîskar Şakir Epözdemir, Nivîskar û Akademîsyên İsmail Beşikçi, Serokê Komeleya Piştgiriya HAK-PAR’ê ya Ewropayê Fattah Timur û endamên komeleyê, Siyasetmedar û Helbestvan Talat İnanç, Siyasetmedar Yüksel Avşar û Nivîskar û Helbestvan Celal İnal jî mêvanên şevê bûn.
Di destpêka bernameyê de ciwanên partiyê bi helbestên Kemal Burkay û Eskerê Boyik dilê beşdaran çoş kirin.
Serokê Giştî yê HAK-PAR’ê Refik Karakoç axaftina destpêk kir.
Karakoç di axaftina xwe de balê kişand ser operasyona Tirkiyê ya li ser Efrînê û bang li hikûmeta Tirkiyê kir ku di demekê kin de operasyonê rawestîne û rêz li ber îradeya Kurdan bigre.
Karkoç di dawiya axaftina xwe de ji bo beşdarî û piştgiriya mêvanan sipasiya wan kir. Bang li gel kir ku piştgiriyê bidin HAK-PAR’ê da ku dengê xwe xurt bike.
Serokê Komeleya Piştgiriya HAK-PAR’ê ya Ewropayê Fattah Timur jî di şevê de bang li beşdaran kir. Timar got; Kurd ligel berxwedanê şahîyê jî ji bîr nakin û tu alî jî nikarin hêstên Kurdan têk bibin.
Piştî axaftinan beşdar bi stranên hunermenda navdar Fate Xanê kêf xweş bûn, govend gerandin.
Her wiha ligel şahiyê, ciwanên partiyê ji bo piştgiriya ciwanan kurayê kişandin, diyariyên rengîn dan mêvanan. Di nav diyariyan de helbesta Kemal Burkay a bi îmzakirî jî hebû. Kemal Burkay helbesta xwe ya çarçovekirî bi xwe da.
Şev bi stran û govenda beşdaran bi dawî bû.
About Post Author
